Şairə Pəri Rəncbərlinin yeni kitablarının təqdimat mərasimi

Cəfər Cabbarlı adına Respublika Gənclər Kitabxanasında şairə Pəri Rəncbərlinin “Ürəyində gəzdir məni” kitabının təqdimat mərasimi keçirilib. Tədbirdə təhsil, səhiyyə, elm, mətbuat sahəsinin nümayəndələri, şəhid ailələrinin üzvləri, gənc oxucular iştirak edib.

Tədbirin aparıcısı “Azad Qələm” qəzetinin baş redaktoru Nəcibə Babakişiyeva Pəri Rəncbərlinin yaradıcılığı haqqında geniş məlumat verərək, onun “Bağışla sevgilim, bağışla məni”, “Sənsizəm”, “Darıxıram sənin üçün” kitablarının müəllifi olduğunu, bir sıra fəxri fərman və mükafatlara layiq görüldüyünü, qardaş Türkiyə dövlətində fəaliyyət göstərən Çukurov Ədəbiyyatçılar Dərnəyinin üzvü olduğunu söylədi.

“Mirvarid Dilbazi Poeziya Məclisi” İctimai Birliyinin sədri, Kəlağayı muzeyinin direktoru, şair-publisist Güllü  Eldar Tomarlı,   Yazıçılar Birliyinin üzvü,  “Azad Qələm”  jurnalının baş redaktor müavini Adilə Qafarqızı, “Aşıq Pəri” Məclisinin üzvü Zeynəb Zəngəzurlu şairə Pəri Rəncbərlinin yaradıcılığı haqqında danışaraq,  müəllifin şeirlərində Qərbi Azərbaycan, Vətən nisgili, doğma, yurda, torpağa məhəbbət motivlərinin  aparıcı mövzu olduğunu bildirdilər.

Tədbirdə Azər.KİVİHİ-nin sədri Çingiz Qurbanoğlu tərəfindən Pəri Rəncbərliyə Media Araşdırma Mərkəzi tərəfindən təsis edilən “Xan qızı Natəvan” mükafatı, Ulu Öndər Heydər Əliyevin 101 illiyi ilə əlaqədar olaraq “Heydər Əliyev 101” medalı,   “Azad Qələm” qəzetinin baş redaktoru Nəcibə Babakişiyeva  tərəfindən isə Fəxri Diplom təqdim edildi.

Tədbir iştirakçıları müəllifin şəxsi keyfiyyətlərindən, vətənpərvər ruhlu bir xanım olmasından danışdılar,  kitabla bağlı fikirlərini söyləyərək, bu səpkili tədbirlərin, kitab təqdimalarının, müəllif görüşlərinin kitabxanalarda keçirilməsi əhəmiyyətini vurğuladılar.

Sonda müəllif Pəri Rəncbərli kitablarını Cəfər Cabbarlı adına Respublika Gənclər Kitabxanasına hədiyyə etdi və tədbirin təşkilinə görə əməyi keçən hər bir kəsə öz dərin təşəkkürünü bildirdi. 

 Tədbir boyunca müəllifin şeirləri səsləndirildi.